සූපවේදය ලෝකයේ ජනප්‍රිය වෘත්තියකි. එසේම කලාවකි. බොහෝ දෙනා ඇලුම් කරන අංශයකි. අපේ රටේද වර්තමානයේ සූපවේද කලාවේ විශාල පිබිදීමක් දක්නට ඇත. අපේ සූපවේදීහු රැසක් ජාත්‍යන්තර ය ජයගෙන ඇත. රටට කීර්තියක් ගෙනදීමට සමත් වූවෝ වෙති.
සූපවේදී රුක්ෂාන් දාබරේ ද එවැන්නෙකි. වර්තමානයේ රූපවාහිනී මාධ්‍ය හරහා ඔබගේ ආලින්දයට පැමිණෙන ඔහු ශ්‍රී ලංකා වෘත්තීය සූපවේදින්ගේ සංගමයේ නිර්මාතෘ ය. ‘බැති සිතින් දන්දෙන්න’ කෘතිය ලියූ ඔහු ඒ තුළින් ඉපයූ මුදලින් සාමණේර ස්වාමින් වහන්සේලාගේ අභිවෘද්ධිය සඳහා 500 නමකට දානය පිළිගන්වා වාර්තාවක් ද තැබූහ. 2016 වර්ෂයේදී ජාතික කිරිබත හාල් කිලෝ 800 ක් යොදා ගනිමින් සාදා වාර්තාවක් තැබීමට ද ඔහු සමත් විය.
වර්තමානයේදී ආයුර්වේද දෙපාර්තමේන්තුවට සම්බන්ධ සූපවේදී වැඩසටහන්වලට සහභාගි වන ඔහු පාසල් දරුවන්ට ගෘහ විද්‍යා විෂය පිළිබඳ දේශන ද පවත්වයි.
අද මවුපිය සෙනෙහසේ මතක හා සම්බන්ධ වන්නේ සූපවේදී රුක්ෂාන් දාබරේ මහතාගේ දියණිය සූපවේදිනී විසුද්ධිකා ජෙනුවරා දාබරේ ය. ඇය කේක් නිර්මාණ ශිල්පිනියක ද වෙයි. ඇය සූපවේදිනියක් ලෙස පුද්ගලික ආයතනයක සේවය කරන අතර රූපවාහිනී මාධ්‍ය ඔස්සේ තම පියා සමග වැඩසටහන් සඳහා ද ඉදිරිපත් වෙයි. විසුද්ධිකාට එක් සොහොයුරෙක් සිටියි. ඔහුද සූපවේදියෙකි. මේ ඇය තම පියාගේ මතකයන් සිහිපත් කරන අයුරුය.
● ඔබ සූපවේදිනියක් වෙන්න හිතුවේ ඇයි?
පුංචි කාලයේ ඉඳලම මම උයන්න ආසයි. 2-3 වසරේදී කාලයේ ඉඳල මම එක එක කෑම ජාති උයනවා. තාත්තා උයනකොට ඒවට උදව් කරනවා. අම්මත් කියලා දෙනවා. වැඩිපුරම දේශීය කෑම තමයි හැදුවේ. තව පුරුද්දක් තිබුණ මට හිතෙන හිතෙන විදිහට වෙනස්කර කර තමයි කෑම හැදුවේ. අම්මයි තාත්තයි කියලා දෙන ඒවාට වෙනස් දෙයක් මොනව හරි කළා. එළවළු ජාති කීපයක් දාලා හත්මාළුව වගේ වෑංජන හැදුවා.
● තාත්තා සූපවේදියෙක් කියන මතකය මොන වගේද තියෙන්නෙ
යුනිෆෝම් එක ඇඳගෙන යනවා මතකයි. මම උයන්න ආසා නිසා ළඟට කරගෙන කියලා දුන්නා. අයියයි මායි ආසා කරන කෑමක් ඉල්ලුවම තාත්තා දෙන්නම ළඟට කර ගෙන උයලා දුන්නා. ඒ නිසා හරිම ආසාවෙන් තාත්තා කරන දේවල් බලාගෙන හිටියා.
● සූපවේදය හදාරන්නේ තාත්තගේ කැමැත්ත නිසාද?
තාත්තාගේ හිතේ තිබිලා තියෙනවා මාව සූපවේදිනියක් කරන්න. පුංචි කාලයේ ඉඳලම මාව හුරු කළේ ඒක නිසයි. පාසලේ විෂයක් හැටියටත් ගෘහ විද්‍යාව කළා. ඊට අමතරව හෝටල් පාසලට ඇතුළත් කරලා ඉගැන්නුවා. තාත්තාගේ උවමනාවට ආසාවට ්‍යදඑැක කීපයකම වැඩක් කළා.
● ඔබ තෝරාගෙන තිබෙන්නේ කේක් අංශය. ඒ ඇයි?
සූපවේදිනියක් වීමට ආසාව තිබුණාට මොන පැත්තද තෝරාගන්නේ කියන එක ගැන තේරුමක් තිබුණේ නැ. තාත්ත තමයි මඟ පෙන්නුවේ කේක් අංශයෙන් ඉදිරියට යන්න කියලා. ඒකට හේතුව වෙන්න ඇත්තේ පොඩි කාලේ ඉඳලම මට තිබුණු කලා හැකියාව නිසා වෙන්න ඇති. නිර්මාණ කිරීමේ හැකියාව මට පිහිටලා තිබුණා. තාත්තාගේ බලාපොරොත්තුව වෙලා තියෙන්නේ මම දක්ෂ ජනප්‍රිය කේක් නිර්මාණ ශිල්පිනියක්වීම දැකීමයි. ඒ සඳහා අවශ්‍ය සෑම සහයක්ම තාත්තා ලබා දෙනවා.
● ඔබ පාසල් යද්දි තාත්තා ජනප්‍රිය සූපවේදියෙක්. එය කොහොමද ඔබට බලපෑවේ?
රූපවාහිනී වැඩසටහන්වල හිටපු නිසා ජනප්‍රියයි. මගේ පාසලේ යාළුවෝ දැනගෙන හිටියා තාත්තා ගැන. ඒ නිසා මට ලොකු ආඩම්බරයක් තිබුණා. තාත්තගේ රූපවාහිනී වැඩසටහන් ගැන යාළුවෝ කතා කළා. ඒ නිසා පාසලෙත් ලොකු වටිනාකමක් මට තිබුණා.
● තාත්තාව ඔබට දැනෙන්නෙ කොහොමද?
මට ඉන්න හොඳම යාළුවා. පුංචි කාලයේ ඉඳලම අම්මට වඩා කිට්ටු වුණේ තාත්තට. තාත්තා හැමදේම හොයලා බැලුවා. පාසල් යන කාලයේ අධ්‍යාපන කටයුතු, පාසල් අමතර හැමදේටම ආවේ අම්මා. තාත්තා ගෙදර ආවම හැමදේ ගැනම අහල හොයලා බැලුවා. මොකද තාත්තා ගේ ක්ෂේත්‍රය හරිම කාර්යබහුලයි. රැයක් දවාලක් නැතිව කාර්ය බහුලයි. තාත්තාගෙ විශේෂත්වය තමයි ඕනෑම ප්‍රශ්නය ගැන එයත් එක්ක කතා කරන්න පුළුවන්වීම.
ඒ හැමදේටම උත්තර තාත්තා ළඟ තිබුණා. ප්‍රශ්න විසඳන්නේ හිත නොරිදා ජීවිතයට අලුත් පාඩමකුත් කියලා දිලා. පුද්ගලිකව හා වෘත්තිය තුළත් ඉදිරියට යන්න ඕනෑ කොහොමද කියලා මට කියාදුන්නේ තාත්තා.
● තාත්තගේ ප්‍රසිද්ධිය නිසා ඔබගේ වෘත්තියට ලැබුණු සහාය කොහොමද?
තාත්තාගේ ජනප්‍රියත්වය හඳුනන අයගේ උදව්වලින් කිසිම දෙයක් ලබාදෙන්න තාත්තා වැඩ කළේ නෑ. අදටත් ඒවගේ මට නිතරම දෙන උපදෙස තමන්ගේ උත්සහය කැපවීම එක්ක ඉස්සරහට යන්න කියන එක.
එයාගේ ජනප්‍රියත්වය තනතුරු පාවිච්චි කරලා කිසිම දෙයක් මට ලබාදීල නෑ. ජීවිතය වෘත්තිය තුළ තැනකට එන්න ස්ථාවරත්වය හදාගන්න උපදෙස් පමණයි දීලා තියෙන්නේ.
● තාත්තාගෙන් ලැබුණු ලොකුම උපදෙස මොකක්ද කියලා ඇහුවොත්.....
මට කිසිම දෙයකට එපා කියලා නෑ. තහංචි දාලත් නෑ. නමුත් විවාහ ජිවිතය ගැන ලොකුම උපදෙස දුන්නා. මට ප්‍රේම සම්බන්ධයක් තිබුණා. ඒක තාත්තා දැනගත්තා. තාත්තා ඒ ගැන මගෙන් අහලා කිව්වේ විවාහ වෙන්න කලින් ස්ථාවරත්වයක් හදාගන්න කියලා. තවම වෘත්තියේ පටන්ගැන්ම ගොඩක් දුර යන්න තියෙනවා. ප්‍රේම සම්බන්ධයක් ඇති කර ගත්තොත් ඔයාගේ ඉලක්කයට යන්න වෙන්නෙ නෑ කියල.
මුලින්ම තමන්ගේ වෘත්තියේ ස්ථාවරයක් හදාගන්න. විවාහ වුණාම සැමියාගෙන්ම යැපෙන්න හිතන්න එපා. මොනයම් විදිහකින් හරි ඔයාලා දෙන්නට වෙන් වෙන් වෙන්න වුණොත් තනියම ජිවත් වෙන්න ස්ථාවරයක් තියෙන්න ඕනෑ කියල.
තාත්තා කියන්නේ හරිම නිහතමානි පුද්ගලයෙක්. අවංකකම, කැපවීම මිනිසුන්ට උදව් කරන්න ඕනෑම වෙලාවක කැපවෙලා ඉන්න චරිතයක්.
● ඔබ ගැන තාත්තා හුඟක් සතුටු වුණු අවස්ථා මතකද?
මම සූපවේදය තෝරා ගැනීම තාත්තට ලොකු සතුටක්. මම අලුත් නිර්මාණයක් කළාම ඒ ගැන හරියට සතුටුවෙනවා. හඳුනන අයටත් කියලා සතුටුවෙනවා. දුව ලස්සනට කේක් නිර්මාණ කරනවා කියලා. මම රූපවාහිනි වැඩසටහන් කරනවාට හරිම කැමැතියි. තාත්තාගේ වැඩසටහන් වලටත් මාව සම්බනධ කර ගන්නවා.
සටහන : ශාන් බන්දු වීරසිංහ
